Illoqarfik Kangerlussuaq kangerluup sinerissamiit 200 kilometerit missaannik takitigisup Kangerlussuup qinnguaniippoq – Sermersuarmiit minutsialunnik ungasitsigisumi. Mittarfiit Kalaallit Nunaanni tikinneqarnerpaartaat Kangerlussuarmiippoq. Kangerlussuarmi inuit 500-t missaanniittut najugaqarput tamarmillu arlaatigut Mittarfeqarfinnut, Hotel Kangerlussuarmut Air Greenlandimullu kiisalu tassani takornariartitsivinnut attuumassuteqarlutik. 

Nunaqarfik taaguuterpassuaqarpoq. Qallunaat taasarpaat Søndre Strømfjord. Kalaallit Kangerlussuarmik taasarpaat ameerikkamiullu taasarpaat Sondrestrom imaluunniit Sondy. Oktober 1992-ip tungaanut pisortatigoortumik taaguuteqarpoq Sondrestrom Air Base imaluunniit Bluie West 8.

Kangerlussuaq 1941-mi US Airforcemit tunngavilerneqarpoq taamanikkut Danmark Tysklandimit tigusarineqarluni Kalaallit Nunaata isumannaatsuunissaa pilersornissaalu isumagisinnaanngimmagu. 1960-imi sakkutooqarfimmi sakkutuujunngitsunut naatsorsuussami aqqusaarlutik angalasunut akunnittarfeqalerpoq, ullumikkut Hotel Kangerlussuaq. 1992-imi ameerikkamiut sakkutuui aallarmata mittarfik Namminersornerullutik Oqartussanut nuunneqarpoq kalaallisullu pisortatigoortumik Kangerlussuarmik taaguuteqalerluni. Januar 2002-p tungaanut Kangerlussuaq sakkutooqarfittut atuuppoq kingornali Sisimiut Kommuniani nunaqarfinngortinneqarluni

Hotel Kangerlussuaq
Kangerlussuup mittarfia Mittarfeqarfinnit, Namminersorlutik Oqartussat ataanni, ingerlanneqarpoq. Ullumikkut mittarfik sakkutuujunngitsunut mittarfiuvoq mittarfimmilu tikittarfiup allineratigut Mittarfeqarfiit ukiualuit ingerlaneranni akunnittarfimmik pikkorissartarfimmillu ingerlalluartunik pilersitsisimapput - tassalu Hotel Kangerlussuaq. Ullumikkut Kangerlussuup mittarfiani ukiumut angalasut 250.000-it sullinneqartarput arlalissuillu akunnittarfimmi unnuisarlutik.